Dance Macabre 86 епизода: Cinema Verite / Found Footage хорор филмови – Документирање на последниот здив
Blood on the camera, death on the tape!
На полноќ помеѓу трети и четврти февруари на Канал 103 започна 86 издание на радио хорор емисијата Danse Macabre посветена на Cinema Verite односно Found Footage хорор филмовите снимени во прво лице. Во оваа епизода станува збор за хорор филмовите во кои се снимени последните моменти од животот на ликовите кои се преблиску до смртта и сето тоа сурово го снимиле на филмската лента. Во оваа епизода позборувавме за тоа каква е функцијата и поставеноста на камерата и заемниот однос кој го има со субјектите кои го снима. Говоревме и за човекот зад камерата и за улогата на гледачот кој од удобноста на својот дом навлегува во мистеријата на ликовите заробени во снимката. Говоревме и за голем број на хорор филмови кои се изработени на овој начин, без разлика на тоа дали станува збор за снимки на убијци кои ги мачат и убиваат своите жртви, снимки на ловци на духови и истражувачи на паранормалното кои стануваат жртви на нивната потрага, снимки од илегални тестирања, снимки од банди во маало или документирање на војна од прва рака. Во емисијата зборувавме за филмовите како: Cannibal Holocaust, Man Bites Dog, The Last Broadcast, The Blair Witch Project, August Underground серијалот, The Last Horror Movie, The Curse, The Zombie Diaries, The Poughkeepsie Tapes, Paranormal Activity, REC, Home Movie, The Troll Hunter, Grave Encounters, The Devil Inside, V/H/S и многу други. Музичките блокови содржеа композиции од бендовите: Zombie, Zombie, Bongripper, Vladimirs, Goatmare & The Hellspades, Creepersin, Orchid и многу други.
Во контекст на темата на оваа епизода јас и Боки одлучивме да направиме еден чекор напред и покрај тоа што ќе може да ја даунлоудирате емисијата од линкот под текстот и да слушнете извадок од емисијата само со говорот од студио, за да бидеме автентични и доследни на тоа што го зборуваме, Боки постави камера и целата емисија беше снимена во видео формат. На тој начин се соочивме со објективот и микрофонот во исто време, заклучувајќи дека не е исто да се биде пред камера и зад неа, а видео снимката на екипата на Danse Macabre ќе може да ја пронајдете по нашето напуштање на светот на живите. Смрт за цензорите и политичката коректност – да живее хорор жанрот.
No comments:
Post a Comment