КОШМАР 11

    

          Новиот број на Кошмар за лето 2011 година е во продажба

 

     

            Се состави коцката и Ксенобајтите излегоа од Пеколот. Излезе во продажба новиот број на македонското хорор списание Кошмар точно пред најголемиот празник на хорор фановите-Халоуин. Во духот на самот празнување, овој број на Кошмар е комплетирање на концептуалниот дуалитет кој беше започнат со претходниот број. Имено, во претходниот број беа задржани поавангардните, поуметничките хорор филмови, за да се отвори простор за акумулирање на најбизарните, најкрвавите и најбруталните модерни хорор филмови да заживеат во овој број. Се комплетираше целосната слика на два круцијални аспекти на хорор жанрот, уметничката експресија и бескомпромисната бруталност. Тоа остава простор секој хорор фан да си го пронајде тоа што му се допаѓа од самиот жанр.

            Единаесеттиот тестамент на Кошмар е женски број наменет за мажи, барем според тоа што може да се заклучи од визуелната понуда. На насловна се наоѓа The Woman, а постерите на последните страни се High Tension и Possession. Не сакам да слушнам некој да рече дека е дискриминиран, има крв за сите. Во овој број на Кошмар објавени се интервјуата со еден од најдобрите европски хорор писатели Дејан Огњановиќ и интервјуто со контроверзниот канадски филмски гениј Карим Хусеин. Покрај честа да се има модерното ремек-дело на Лаки Мекки на насловна, од останатите модерни хорор филмови кои подлегнаа на сечилото од анализата на овој број се: Seconds Appart на Негрет и ирскиот Wake Wood, Вановиот Insidious и лудачкиот Grave Encounters, домашните инвазии во Kidnapped и Mother's Day на Боусман. Психолошките Luster и The Caller, слешерските продолженија Chromeskull: Laid To Rest 2 и Final Destination 5, бизарните Wound и Cold Fish. Во списанието се отвори простор и за нова рубрика која ќе ги тематизира независните брутални хорор филмови кои ќе се сепарираат од другата содржина во една крвава грајндхаус проекција во која може да прочитате за Psycho Holocaust и Maskhead. Во овој број секако дека има место и за новите хорор комедии: британската Attack The Block, јапонската Big Tits Zombie и романските Strigoi. Од хорорите од минатото, кои не смее да се заборават, своето место во списанието го најдоа: The Exorcist на Фридкин, Possession на Жулавски, психолошкиот Jacob's Ladder, Кроненберговиот Shivers, францускиот High Tension и The Mummy со Борис Карлоф. Контињер-от е полн со незначајни филмови кои секако дека треба да се заборават. Во Кошмар 11 ги има последните епизоди од втората сезона на Masters of Horror серијалот, анализа на првата сезона на The Walking Dead, приказ на филмскиот серијал за The Omen, третиот и четвртиот дел од шокументарците на Traces Of Death серијалот. Џо Данте е режисерот чија биографија и филмографија е приложена во бројот, а овој пат убијците од Фајрфлај семејството ја збогатија содржината на бројот. Како што може да се забележи од изборот на филмови доминира една хорор идеологија која можеби беше потаен предвесник на бројот, а тоа се Боди хорор филмовите кои ги има во поголем број во ова издание. Во овој број го има и извештајот од филмските хорор фестивали и тоа што ќе се подготвува во идина на полето на хорор кинематографијата. Музичките рецензии не се изоставени и доследно на концептот тука се грајндерските рецензии, рецензиите на хорор панк бендовите и саундтраците. Од литературниот аспект, во списанието има еден есеј за тоа што значи пиратеријата и зошто таа постои, анализа на збирка раскази од српскиот автор Ненад Стакиќ и бизарен расказ на авторот на Кошмар.   

            Цената останува иста (60 денари), бројот на страните останува ист (40), форматот исто така е идентичен (А4), но различна е неговата внатрешност, испечатена на крвавите страни. Овој Халоуин поминете го со маска на лицето, јаболко со жилет во едната рака и Кошмар во другата. Новиот број, како и претходниот број на Кошмар, ќе може да ги купите и на Мракфест, ревијата на современ хорор филм кој ќе се одржи од 30 октомври до 3 ноември. Уживајте во хорор филмовите и читајте Кошмар.  

Во сите хорор филмови во кои имам учествувано, сите жени кои ги имам глумено беа силни жени. Никогаш не сум глумела жртва, иако секогаш сум била во опасност.

                                                                                 Адриен Барбо