ЗАРОБУВАЧИ НА СМРТТА ВО КИЧЕВО

            Уметничкиот караван наречен „Заробувачи на смртта“ патува низ Македонија. Кичево е дестинацијата на која ќе бидат изложени творбите кои ги имаат создадено Златко Ѓелески и Игор Аврамоски. Причината поради која оваа поставка се сели од главниот град во другите градови е потребата да се доближат авторските дела до читателите и гледачите во останатите градови на државата кои не смеат да бидат сепарирани и игнорирани во поглед на модерните текови на уметноста. Жителите на овие градови имаат подеднакво право на уметност како жителите на главниот град. Уште поголемо задоволство претставува фактот што Игор и Златко голем дел од својот живот го имаат поминато во Кичево и оваа промоција ќе биде одржана на „домашен терен“ во градот во кој неговите жители биле голема инспирација за создавање на дел од ликовите и настаните во „Морбидизам“ и сликите и цртежите од кои е составена „Креатури на смртта“. Се надеваме дека успешната промоција која се случи во Младинскиот културен центар во Скопје од четврти и петти септември ќе се повтори и во НУЦК Кочо Рацин во Кичево на 21 септември.

  

            Златко Ѓелески е млад писател кој смело и вешто ја комбинира жанровската литература, конкретно хорор жанрот со психолошкиот трилер, надреализамот, научната фантастика, пародијата и бурлеската, филозофскиот егзистенционализам и фолклорните преданија, за сето тоа, преку механизмите на постмодернизмот, да го употреби за отворање на нова страница во македонскиот фантастичен расказ и создаде уникатни дела кои се вистинско богатство за македонската литература. Ѓелески останува истражувач на најтемните домени на човечкото постоење, таму каде што натприродното, непознатото изабранетото знаење ја имаат оформено својата империја, а тој со помош на зборовите ја преточува темнината на хартија. Ѓелески е борец за литературата на имагинарното а „Морбидизам“ е неговата лична карта и манифест на македонскиот фантастичен расказ.

            Како што Златко Ѓелески ја заробува смртта со помош на зборовите на листовите хартија во „Морбидизам“, така и игор Аврамоски со помош на боите ја овековечува смртта на сликарското платно. Ако Златко ги порекнува жанровските конвенции комбинирајќи ги со најразлични стилски формации за добивање на литературни хибриди кои не биле присутни во македонското творештво, така Аврамоски користи средства и материјали кои не се практикуваат во сликарските техники но тие експерименти водат кон нови и неистражени предели на ликовната уметност. Ѓелески и Аврамоски заговараат нова естетизација на грдото, самосвесно прекршувајќи ги сенилните уметнички принципи, создавајќи креации за кои на долго и на широко ќе се говори во иднина. Затоа Ве покануваме да бидете дел од овој уникатен и незаборавен уметнички настан.

            Дотогаш, „Морбидизам“ може да се набави во книжарите на Табернакул, Или-Или, Култура и Три.  

ПРОМОЦИЈА НА МОРБИДИЗАМ И КРЕАТУРИ НА СМРТТА

   На 4-ти и 5-ти септември во Младинскиот Културен центар, во фоајето пред кино Фросина во 20 часот ќе се одржи промоцијата на збирката кратки хорор раскази „Морбидизам“ од Златко Ѓелески и изложбата на слики и цртежи насловена „Креатури на смртта“ од Аврамоски Игор. Промотивната цена на збирката „Морбидизам“ од Златко Ѓелески изнесува 150 денари. Со првите педесет примероци следува аудио диск со раскази прочитани од самиот автор на книгата. Предвиден е коктел за посетителите на настанот кој го носи името „Заробувачи на смртта“. Влезот е слободен, а присуството е задолжително!

Што ќе добиете ако ја помешате опсесијата на ликовите на По, лудилото од светот на Лавкрафт, надреалниот апсурд на Кортесар, телесниот хорор на Баркер, отуѓеноста на Кафка, сеништата и покојниците на Мамлеев, авторската автодеструкција на Кинг, со бодлерова фасцинација за естетизацијата на грдото и со здрава доза на егзистенционализам, психоанализа, дуализам и кошмарни халуцинации, зачинето со научна фантастика и црн хумор, реализирани во постмодернистички манир? Одговорот е „Морбидизам“ на Златко Ѓелески.

Љубителите на филмот во книгата ќе може да откопаат реминесценција на калеидоскопски колажи од Twilight Zone до Дејвид Кроненберг и Линч; од Кен Расел, преку Дарио Арџенто до Брајан де Палма.

„Морбидизам“ е манифест на македонскиот фантастичен расказ, а неговиот автор е борец за литературата на имагинарното, истражувач во најтемните простори на човечкото постоење, смело откривајќи ги домените на натприродното, необјаснливото, непознатото и забранетото знаење. Хорор преданија раскажани на македонски начин. Педесет кратки и смели литературни бодежи кои никој читател нема да го остават рамнодушен.

Златко Ѓелески е писател, филмски, музички и книжевен критичар, роден на 9 февруари 1986 година во Битола. Основно и средно училиште има завршено во Кичево, а дипломира на катедрата за општа и компаративна книжевност при факултетот „Блаже Конески“ во Скопје во 2010 година. Живее во Скопје.

Активно работи за промовирање на хорор културата во Македонија, автор, уредник и издавач е на хорор списанието „Кошмар“ од 2008 година до денес. Тој е дел од водителската екипа на радио хорор емисијата „Danse Macabre“ на Канал 103. Тој има објавено голем број на филмски рецензии во неколку магазини и е уредник на веб страната movies.mk и има објавено неколку музички рецензии на plagijat. Toj e еден од организаторите на ревијата на хорор филмови „Мрак Фест“.

„Морбидизам“ е неговата прва збирка на раскази. Во подготовка е неговата втора збирка наречена: „Колекционер на страв“.

Изложбата на слики и цртежи „Креатури на смртта“ се состои од четири циклуси посветени на раѓањето, создавањето, умирањето и повторното раѓање на смртта. Аврамоски Игор успева да ја зароби вечната мистерија на сликарското платно, да му даде живот на умирањето и да ги долови сите фази на декомпозицијата на непостоењето.

Смртта е присутна во сите наративи на оваа серија. Таа ја предизвикува тагата кон изгубените сакани, ширејќи го својот деструктивен допир со кој руши цели семејства, само за да собере нови примероци за својата колекција на смртници. Taa ја почнува играта на судбината која од гледачот прави бродоломец соочен со неоткриените мистерии на проколнатиот остров со кој владеат демонските сили, носители на човечкото лудило. Таа е биограф на мртвиот дух кој се ослободува од запечатениот гроб и ја шири својата злоба над градот на иднината. Таа ги крои сцените на распаѓањето, сонот на смртта и чекорите кон небиднината. Смртта станува верен сопатник на гледачот низ мрачните димензии на творештвото на Аврамоски Игор.

Делата на Аврамоски кокетираат со хорор жанрот, но истовремено поседуваат сопствена длабочина и одредена доза на загадочност која ве тера да се замислите над нив. reper.net.mk

Аврамоски Игор е роден 1993 година во Кичево. Средно училиште заврши во гимназијата Мирко Милески во Кичево, на отсекот Електротехничар-Енергетичар. Во периодот 2009-2012 се занимаваше со музика, и беше фронтмен на кичевскиот бенд Arrested Army, а во меѓувреме се роди љубовта кон ликовната уметност, па откако бендот се растури Игор сериозно почна да се занимава со ликовната уметност. Во 2012 почна да студира во ликовната академија св. Кирил и Методиј – Скопје, на отсекот Ликовна педагогија.

 

КОШМАР број 14 (есен/зима 2012/2013)

            Излезе во продажба четиринаесеттото издание на македонското хорор списание Кошмар. Секој број на Кошмар има свои новитети, а овој број може да се пофали со неговата проширена големина. Имено, 14-тото издание на Кошмар се простира на 56 страници. Тој нов простор е исполнет со интервјуа со хорор режисери од три континенти, режисери кои имаат снимено голем број на квалитетни модерни хорор филмови. Во овој број на Кошмар ќе може да ги прочитате интервјуата со британските режисери Адам Мејсон и Алекс Чендон, со француската режисерка со босанско потекло Лусил Хаџихалиловиќ, хорор режисерот од Колумбија Антонио Негрет и со американскиот режисер Адам Рејмајер. Анализирани се актуелните хорор филмови како новото остварување на францускиот режисер Паскал Ложие The Tall Man, хорор антологијата ABC’s Of Death, cinema verite хорорите Lovely Molly и V/H/S, новиот филм на Џенифер Линч Chained, Дикерсоновиот Sinister, продолженијата: The Collection и The Thompsons, хируршките American Mary и Excision, јапонски хорор филмови и модерни хорори инспирирани од италијанските хорори на 60-тите и 70-тите години на минатиот век. Хорор комедиите се неизбежен дел и од овој број на Кошмар. Честа на хорор класиците во 14-тиот број на Кошмар ја бранат Tenebre на Арџенто, Peeping Tom на Пауел, Tesis на Аменабар, Rosemary's Baby на Полански, The Devils на Кен Расел, Sisters на Де Палма, режисерот чијшто филмски опус на долго и на широко е елабориран во ова издание и други филмови. Новитет е рубриката посветена на авторите на специјални ефекти и прегледот на нивното животно дело како составен дел од хорор културата, а избраникот за овој број е Том Савини.  

            Во овој број на Кошмар исто така може да прочитате текстови за Mondo Cane и Halloween серијалот, анализа на American Horror Story: Asylum и на три епизоди од првата сезона на серијата Fear Itself. Убиецот на ова издание е Ghostface. Во овој број ќе може да прочитате и еден есеј за значењето и местото на 3Д технологијата во хорор жанрот. Апокалиптичните и постапокалиптичните хорор филмови го имаат најдено своето место во хорор идеологијата на овој број. Филмските вести и извештајот од светските хорор филмски фестивали исто така се присутни во ова издание. Текстот за златните години на експанзијата на американскиот хорор стрип е дел од овој број, исто како и музичките рецензии засилени со враќањето на рубриката посветена на филмската музика. Во списанието има и едно портфолио на GAP Photography фото студиото кое се занимава со промовирање и ширење на хорор културата. Во овој број рецензирани се книгите: The Last Final Girl на Стивен Грахам Џоунс и збирката раскази Морбидизам на Златко Ѓелески, авторот на Кошмар. Ова издание не би било целосно без новиот расказ на авторот на списанието и неговите видувања презентирани во рубриката Последен здив.

            Авторот на Кошмар се извинува доколку некоја фотографија е премногу темна, списанието се печати со крв, а крвта знае да биде доста проблематична.         

Кошмар треба да го има во секој дом на македонските хорор фанови и љубителите на хорор филмови, затоа што ова списание е создадено за нивно уживање. Излегува два пати во годината, а потребна е двомесечна интензивна работа за создавање на еден број. Тие што ќе го купат Кошмар се тие што ќе добијат многу повеќе за тоа што ќе го платат. Реалната цена на ова списание е десет пати поголема, но поради македонскиот стандард таа изнесува само 80 денари. Ако гледате хорор филмови Кошмар е списанието за вас и дозволете му да биде вашиот водич во светот на мрачната уметност. Пратете мејл или порака на авторот на списанието и нарачајте го ова издание или некое од постарите изданија. Квалитетот на Кошмар може да го потврдат долгогодишните читатели на списанието. Гледајте хорор филмови и уживајте во нив. Смрт за цензурата и политичката коректност. Да живее 14-тиот Кошмар.

Автор: Златко Ѓелески

Контакт мејл: koshmarmk@yahoo.com   

Контакт телефон: 071-602-119

КОШМАР 13-ТИ (Пролет/Лето 2012)

           Во септември се роди тринаесеттиот број на македонското хорор списание Кошмар. Покрај самата симболика со бројот на изданието Кошмар слави и четири години на постоење. Во таа чест, списанието подлегна на неколку промени со кои соодветно требаше да се симболизира овој премин. Списанието се зголеми за десет страници и сега вкупниот број на страници изнесува 50. Паралелно со тоа се зголеми и неговата цена – 80 денари, што повторно е под неговата вистинска вредност. За соодветно да се прослави неговата еволуција, направени се специјални интервјуа со најголемите и најзначајните хорор кралици на денешницата: Деби Рошон, Бјанка Барнет, Шенон Ларк, Јованка Вучковиќ, Силвија и Џен Соска - жени кои ги рушат сите стереотипи на жанрот. Вистинско богатство кое ќе им се допадне и на женските и на машките читатели на Кошмар. Покрај овие извонредни интервјуа со шесте прекрасни хорор режисерки и актерки, може да се прочитаат рецензии за најзначајните хорор филмови кои се појавија во периодот меѓу февруари и август оваа година, како што е одлично снимениот француски Livid, артистичкиот Beyond The Black Rainbow, The Divide на Ксавиер Генс, воениот Neprijatelj, готските The Moth Diaries и Woman In Black, американските Cabin In The Woods и Midnight Son и голем број на шпански, италијански и хорор филмови од Далечниот Исток. Како и секогаш списанието содржи и хорор комедии за кои вреди да се умре од смеа. Од класиците на хорор жанрот во овој број ќе може да се прочитаат анализи за Carrie на Брајан Де Палма, криминалистичкиот Angel Heart, Visitor Q на Такаши Мике, зомби комедијата Braindead на Питер Џексон, Twitch Of The Death Nerve на Марио Бава, It's Alive на Лери Коен - авторот чија филмографија е предмет на овој број и други. Серијалите за шокументарецот Faces Of Gore, Re-Animator, првата сезона на Fear Itself и Black Mirror исто така може да ги прочитате во овој број. Убиецот на овој број е Pennywise, а ќе може да го прочитате и продолжението на есејот за цензурата во хорор индустријата, како и текст за Хамер хорор продукцијата и фестивалски извештај за програмата на светските хорор фестивали и македонскиот Мракфест 1.666. Новитет во списанието е рубриката посветена на хорор стрипот и зголемен е бројот на рецензиите на хорор литературата, така што во овој број ќе може да прочитате анализа на дела на Марк Морис и Ѓорѓе Бајиќ, како и нов расказ на авторот на списанието. Музичките рецензии не се изоставени од 13-тиот тестамент на Кошмар. Овој број од списанието е испечатен на 50 страници со колор насловна страна и два црно-бели постери од Brain Dead и Beyond The Black Rainbow.

            Се надевам дека ќе ви се допадне овој број на Кошмар и ќе продолжите да го поддржувате излегувањето на ова списание со што ќе може да уживаме во нови изданија посветени на хорор културата во Македонија. Смрт за цензурата и политичката коректност. Да живее Кошмар 13-ти.          

Автор: Златко Ѓелески

Контакт мејл: koshmarmk@yahoo.com   

Контакт телефон: 071-602-119

Морбидизам на Златко Ѓелески

 

Морбидизам на Златко Ѓелески, Македонски Кошмар, 2012

          „Морбидизам“ е првата збирка на кратки хорор раскази на Златко Ѓелески. Таа е сублимат од хорор раскази кои се пишувани во период од пет години. Во неа има селекција од педесет хорор раскази, поделени во три групи: првата ги содржи расказите кои се напишани пред пет, односно четири години, втората ги содржи најдолгите раскази кои се напишани пред три години, а во третиот дел од збирката се наоѓаат последните раскази кои ги има напишано авторот. Тоа е најдобар начин да се забележи еволуцијата на неговиот стил и начин на пишување и изборот на теми кои периодично доминирале во неговата проза. Скоро сите хорор поджанрови се дел од оваа збирка, односно застапени се тие хорор поджанрови чиј конвенции и клишетизирани шаблони се предизвикуваат со експеримент во кој се предизвикува границата на нивното дејствување. Авторот во своите раскази употребува голем број на постмодернистички техники за поигрување со тропите на жанрот. Дел од ликовите на расказите се само одраз не нечие непостоење, тие се одблесоци од спомените кои ги имаме за некои луѓе и појави од далечното минато или пак се кошмарни визии за блиската иднина. Оваа книга е издадена под етикетата на дигиталната издавачка куќа која се нарекува „Македонски Кошмар“, создадена само со една цел – промовирање на хорор културата во Македонија. Златко Ѓелески е сопственикот на ова издаваштво кое во иднина ќе продолжи да го промовира и поддржува хорор жанрот во оваа држава. Потребата за дигиталното издаваштво се јави во моментот кога овие раскази беа понудени на македонските книжевни издавачи и не беа прифатени поради жанрот во кој беа напишани. Затоа „Морбидизам“ останвува да биде бесплатно дигитално издание сé додека луѓето не сфатат дека и хорор литературата е дел од уметноста, со свои правила, вредности и квалитети. Секако дека останува простор некој од македонските издавачи да ги надмине своите предрасуди околу жанрот и да ја издаде книгата во печатена форма, а сé додека тоа научно-фантастично сценарио не стане реалност оваа збирка на хорор раскази ќе може да ја симнете од овој блог под капата на „Македонски Кошмар“. „Морбидизам“ е прилично субверзивна и бизарна книга која мора да биде издадена на овој начин за бескомпромисно да се сочува нејзината моќ. 

Печатеното издание на книгата е во подготовка.

Danse Macabre 104 епизода: Кој се плаши од жените?

Women in Horror

            На полноќ помеѓу трети и четврти јули на брановите на Канал 103 започна 104 издание на радио хорор емисијата Danse Macabre посветено на жените во хорор индустријата. Во оваа емисија имавме две гостинки со кои јас и Боки позборувавме за различните ставови кои ги имаат гледачките на хорор филмови со одредени проблематики кои го тангираат жанрот, како на пример финалните девојки, голотијата во филмовите и воопшто создавањето на женски ликови на филмското платно. Зборувавме и за неколку актерки кои со своите изведби имаат оставено траен белег не само во својата кариера туку и во хорор жанрот, актерки како Сигурни Вивер, Џејми Ли Кертис, Барбара Стил, Ингрид Пит. Зборувавме за револуцијата која на овој план ја направи и Елвира со нејзината шармантна појава на филмското платно и за самата трансформација од актерки кои глумат жртви во хорор филмови стануваат актерки кои се кралици на мракот и олицетворение на злото. Во емисијата секако дека не останаа заборавени и големиот број на хорор режисерки кои се обидуваат да создадат свој кинематографски стил во филмскиот свет со кој доминираат мажите, авторки како: Мери Харон, Мери Ламберт, Џенифер Линч, Роберта Финли, Антонија Бирд, Клер Дени и многу други. Музиката која беше составен дел од емисијата се состоеше од композиции на бендови кои имаат женска вокална интерпретаторка како на пример: Which Mountain, Blood Ceremony, Opera IX, The Creepshow, Zombina And The Sceletons, Coven, Cadaveria,  Matriarch, Malsain, Ordo Funebris и многу други.

            Линкот за спуштање на емисијата, како и секогаш, може да го пронајдете под текстов. Со оваа емисија се надеваме дека помогнавме во рушење на неколку полови стереотипи за тоа кој смее да биде пред и зад камерата за време на снимање на хорор филмови. Ова е претпоследна епизода на Danse Macabre за оваа сезона, така што до наредното слушање уживајте во хорор филмови и плашете се.

Линк за емисијата:   

http://i.mixcloud.com/CB7FLW 

http://www.sendspace.com/file/fmwq46 

Danse Macabre 103 епизода: Гаспар Ханеке

Gaspar Haneke

            На полноќ помеѓу 26 и 27 јуни започна 103-тото издание на радио хорор емисијата Danse Macabre на Канал 103. Оваа епизода беше посветена на двајца маестрални режисери чиј имиња се поим за субверзивната кинематографија, господата Гаспар Ное и Михаел Ханеке. Во оваа епизода Јас и Боки се обидовме да пронајдеме неколку заеднички нишки помеѓу делата на овие автори, но во преден план беше анализата на нивниот стил на режирање, најчестите теми кои ги тангираат нивните филмови и начинот на кој ја изведуваат стилизацијата на насилството и порнографијата. Во преден план од кинематографијата на Ное беа поставени неговите краткометражни филмови, но секако дека неговите феноменални три долгометражни филмови не беа поштедени од нас. Акцентот беше поставен на начинот на естетизацијата на порнографијата, инцестот и силувањето во неговите филмови, стилизирањето на одмаздата и носењето на круцијални одлуки врз основа на гневот. Од Ханеке во центарот на вниманието беше неговата „глечерска“ трилогија, поигрувањето со концептот на децата како насилници и убијци,  воајеризмот и медиумите, алиенацијата на европскиот човек/семејство во модерните општества, потиснатите сексуални пориви и други тематски одредници кои се во неговите филмови. Музиката за оваа емисија мораше да биде доволно агресивна како и самата тема, па затоа во музичките блокови ќе слушнете композиции од: Slayer, Kreator, Exodus, Tool, Cathedral, Candlemass, Pantera, Black Label Society, Peter Steele, Paradise Lost, Kyuss, King Diamond и многу други.   

            Под текстот може да го пронајдете линкот за симнување на емисијата. Со оглед на тоа што погубно е фаворизирањето на било кој од овие револуционерни режисери, се обидовме да направиме една кованица – Гаспар Ханеке, зборовна формула која најдобро ќе го претстави сублиматот на филозофската, идеолошката и визуелната генијалност на овие сликари на мрачните домени на човечкото постоење. До наредното слушање, гледајте хорор филмови и плашете се!

Линк за емисијата: 

http://www.sendspace.com/file/zb8w9s 

http://i.mixcloud.com/CB5lAW